دامەزراوەی پەی ڕایگەیاند، بۆ ئەم خولەی پەرلەمان لە كۆی هەزار و 191 كاندیدی لیستەكان و سەربەخۆكان، تەنها 39 كەس خاوەنی بڕوانامەی دكتۆرا، 51 ماجستێر، 339 بەكالۆریۆس، 86 دبلۆم و 679 كاندیدیش بێ بڕوانامە تۆماركراون، كە لە بەرامبەر ناوەكانیاندا یا بڕوانامەی سەرەتایی و ناوەندی یا دەستەواژەی (یقرأ ویكتب) تۆمار كراوە، بەوەش 57.01% ڕێژەی ئەوانەی كاندیدن بڕوانامەیان نیە.
دامەزراوەی پەی بۆ پەروەردە و گەشەپێدان، ئەمڕۆ دوشەممە لە ڕاپۆرتێكدا بەناوی "ئاستی بڕوانامەی كاندیدان بۆ هەڵبژاردنی خولی شەشەمی پەرلەمانی كوردستان" بڵاویكردەوە، لەو هەڵبژاردنەی بڕیاربو بۆ خولی شەشەمی پەرلەمان كوردستان لە 10ی (حوزەیران/6)ی ئەمساڵ ئەنجامبدرێت، هەڵسەنگاندنێكمان بۆ ئاستی بڕوانامەی كاندیدی سەرجەم لیست و قەوارەكان و كاندیدانی سەربەخۆ كرد، ئەو كاتە بەپێی داتا فەرمییەكانی كۆمسیۆن ژمارەیەكی زۆر لە كاندیدەكان بڕوانامەیان نەبو و ئاستی خوێندەواریان نزم بو".
ئاماژەی بەوەشكرد، لەكۆی گشتیی 861 كاندید بۆ ئەو هەڵبژاردنە كە داواكاریان پێشكەشی كۆمسیۆن كردبو، تەنها 23 دكتۆرا، 48 ماجستێر، 249 بەكالۆریۆس، 76 دبلۆم و 465 كاندیدیش بێ بڕوانامە تۆماركرابون، لە بەرامبەر ناوەكانیاندا یا بڕوانامەی سەرەتایی و ناوەندی یا دەستەواژەی (یقرأ ویكتب) تۆمار كرابو، بەوەش رێژەی ئەوانەی بڕوانامەیان نەبو رێژەی 54%ی سەرجەم كاندیدەكانی پێكدەهێنا.
دامەزراوەكە باسی لەوەشكرد، "ئەو كاتە ئێمە لە بانگەوازێكدا كە ئاراستەی سەرجەم لایەنە سیاسییەكانمان كردبو، داوامان كرد، كەسانی (بڕیار بەدەست، لێهاتوو، بە ئەزمون و خاوەن پسپۆریی جیاجیا و خاوەنی بڕوانامەی فیعلی) كاندید بكەن، چونكە پەرلەمان پێویستی بەم جۆرە كەسانە هەیە، لەو كاتەدا ئەوە بو هەڵبژاردن دواخرا و دەرفەتێك بە قەوارە سیاسییەكان دراو دەیانتوانی بەم كارە هەڵسن".
ئەوەشی خستەڕو، لەو لیستانەی بۆ جاری دوەم و بۆ هەڵبژاردنی 20ی (تشرینی یەكەم/10)ی ئەمساڵ پێشكەشیان كردەوە، نەك هەر گۆڕانكاری نەكراوە بەلایەنی ئەرێنییەوە بەڵكو بەرەپێی داتا فەرمییەكانی كۆمسیۆن بەرەو دواوە گەڕاوەتەوە، ئەوەتا لە كۆی هەزار و 191 كاندیدی لیستەكان و سەربەخۆكان، تەنها 39 كەس خاوەنی بڕوانامەی دكتۆرا، 51 ماجستێر، 339 بەكالۆریۆس، 86 دبلۆم و 679 كاندیدیش بێ بڕوانامە تۆماركراون.
دامەزراوەكە ڕونیكردەوە، رێژەی ئەوانەی بڕوانامەیان نیە، بەرزبوەتەوە بۆ رێژەی 57.01%، ئەمەش دەرخەری ئەوەیە كە لایەنە سیاسییەكان نایانەوێت كەسانێكی بەهێز بنێرنە پەرلەمانەوە.
لە ڕاپۆرتەكەدا ئەوەشهاتوە، هەرچەندە بڕوانامە هەموو پێوەرێك نیە و یەكێكە لە پێوەرەكان، بەڵام ئەگەر پەرلەمانێکی بەهێز و پرۆفیشناڵمان دەوێت، پێویستە ئەوانەی دەنێردرێنە پەرلەمانەوە بەپێی ئەو 19 لیژنە پەرلەمانییەی هەن، پسپۆریان هەبێت و كەموكوڕی لە كاروباری لیژنەكان دروستنەبێت. سەرجەم ئەم داتایەنەش داتای حەقیقی کۆمسیۆنی سەربەخۆی هەڵبژاردنەکانن و وەک داتای فەرمی تۆمار کراون و مامەڵەیان لەگەڵدا دەکرێت.