کاروان گەزنەیی
حکومەتی هەرێم خەریکە لەژێر هەژمونی تاقمێکی خۆسەپێن و بێ ئاگا لە دۆخی ژیان و گوزەرانی هاووڵاتییان، ئاڕاستەی بڕیارەکانی بەرەو کەنارێکی مەترسیدار دەڕوات؛ ڕۆژێک هەڵگرتنی پارێزبەندی و ڕۆژێکی دیکە پەلاماردانی پەرلەمانتار و شکاندنی شکۆی مامۆستا و فەرمانبەران و مووچەخۆران.
ڕۆژێک هەڕەشەکردن لە خۆپیشاندەران و ڕاوەشاندنی پەنجە لە پەرلەمانتار و وەزیر و هەڕەشەکردن بەوەی کە هیچ کەس پارێزبەندی نییە، جارێکی دیکە بێ هیواکردنی دایکانی شەهید و دەرچووانی دانەمەزراو! برسیکردن و تۆقاندن تا دەگاتە شکاندنی شکۆی هاووڵاتییان و مافیاگەری نەوتی و قاچاخچیێتی!
ئەمانە پێکەوە زەمینە سازی دەکەن بۆ تەقینەوەیەکی پەنگخواردو و بڕینی ئەو پەنجانەی هەڕەشە دەکەن، و دامرکاندنەوەی ئەو دەنگانەی دەبنە هۆکار بۆ بڕینی قوت و گوزەرانی هاووڵاتییان و برسیکردنییان.
(۳) مانگ جارێک مووچە بە لێبڕینەوە دابەش دەکەن، و پەنجەش بەڕووی هاووڵاتییان بەرز دەکەنەوە؟ دڵنیابن تاقی کردنەوەی ئارامی هاووڵاتییان، هەولێری ناخپڕ پێش هەر شوێنێکی دیکە دەهەژێنێت و ژانی لەناو بردنی خەڵکانی خۆسەپێن دەیگرێت!
چارەسەری ڕیشەی تەنها و تەنها ڕێککەوتنە لەگەڵ بەغدا و پێداچوونەوەیە بە داهاتەکانی هەرێم و چاکسازی ڕاستەقینەیە لە پڕۆسەی نەوت و داهات لە هەرێم و تەواوی خاڵە سنوورییەکان، بەرلەوەی دۆخەکە لەوە خراپتر ببێت! دەبێت بەزووی دەستببرێت بۆ ئەم هەنگاوە کردارییانە، کە ئێمە دوو ساڵە بە هەموو ڕێکارێکی پەرلەمانی کارمان لەسەر کردون و کەس گوێی نەگرتووە!!