ئه‌ندامێكى تیمى میدیایی كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق ئاشكرایده‌كات، ده‌رگاى خۆ پاڵاوتنى لیست و كاندیده‌كان بۆ هه‌ڵبژاردنى په‌رله‌مانى كوردستان كراوه‌ته‌وه و ده‌شڵێت: “تاوه‌كو ئێستا 10 پارت و دوو هاوپه‌یمانیه‌تى خۆیان تۆمار كردووه”.
ئه‌مڕۆ شه‌ممه 8ى حوزه‌یران، عیماد جه‌میل، ئه‌ندامى تیمى میدیایی كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق له نوێترین چاوپێكه‌وتنى ته‌له‌فزیۆنیدا له‌گه‌ڵ كه‌ناڵى ته‌له‌فزیۆنى رووداو وتى: “ده‌رگاى خۆپاڵاوتن بۆ لیست و كاندید و هاوپه‌یمانیه‌تیه‌كان بۆ هه‌ڵبژاردنى په‌رله‌مانى كوردستان كراوه‌ته‌وه، تاوه‌كو ئێستا 10 پارت و دوو هاوپه‌یمانیه‌تى خۆیان تۆمار كردووه”.
وتیشى: “ئه‌مڕۆ كاندیدى پێكهاته‌كان ناوى خۆیان تۆمار ده‌كه‌ن له كۆمسیۆن”.
ئه‌ندامه‌كه‌ى تیمى میدیایی كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق ئه‌وه‌شى خسته‌ڕوو، “به زووترین كات سه‌رۆكایه‌تى هه‌رێم مه‌رسومێك ده‌رده‌كات بۆ دیاریكردنى واده‌یه‌كى نوێ بۆ هه‌ڵبژاردنى په‌رله‌مانى كوردستان”.
له‌باره‌ى ئاماده‌كارییه لۆجستیكییه‌كانه‌وه عیماد جه‌میل ئه‌وه‌شى خسته‌ڕوو، “ئه‌و 69 ملیاره‌ى بۆمان ته‌رخانكراوه پاره‌یه‌كى پێویسته و ده‌توانین كاره‌كانى په‌رله‌مانى كوردستان پێبه‌ڕێوه‌به‌رین”.
عیماد جه‌میل جه‌خت له‌سه‌ر ئه‌وه‌شده‌كاته‌وه، “ئاماده‌كارییه‌كان بۆ هه‌ڵبژاردنى په‌رله‌مانى كوردستان به‌باشى به‌ڕێوه‌ده‌چن”.