گوليزار رشيد سندى
وه‌كى داخۆیانییه‌ك ل سه‌ر وان پێرابوونێن ژ لایێ سه‌رۆكا په‌رله‌مانیڤه (د. رێواز) هاتینه كرن دڤێت ئه‌م سه‌ر راوه‌ستیانه‌كا یاسایی بكه‌ین دا وان ئالۆزییان شرۆڤه‌بكه‌ین ئه‌وێن ل دویڤ وێ بریارا هه‌لوه‌شاندنێ هاتین بۆ راكرنا پارێزبه‌ندییێ ل سه‌ر په‌رله‌مانتار سۆران عمر كۆ 57 په‌رله‌مانتاران ده‌نگ ل سه‌ر دابوو ب به‌هانه‌یا وێ ئێكێ كۆ بریارا هه‌لوه‌شاندنێ د ناڤ تایبه‌تمه‌ندییێن سه‌رۆك په‌رله‌مانیدا نینه د مادێ 18 ژ سیسته‌مێ ناڤخۆییدا كۆ ژمارا وان 16 تایبه‌تمه‌ندینه.
گه‌ر ئه‌م پێداچوونه‌كێ ل مادێ 4/48 بكه‌ین كۆ بریارا وێ پشتبه‌ستنێ ل سه‌ر وێ دكه‌ت، ما بابه‌ت ب بوچوونا 57 په‌رله‌مانتاران یێ گرنگ نینه كۆ بچیته د ناڤ كارنامه‌یێدا ل 6/5/2020 بۆ زانین تشته‌كێ ب ڤى ئاوای ل 11/7/2019 رویدابوو ده‌ما ده‌نگدان ل سه‌ر سه‌رۆكاتییا وێ هاتیه كرن و ئه‌ڤه به‌لگه‌یه كۆ یا گرنگ بوو ل دویڤ بۆچوونا ڤى ژمارا مه‌زنا په‌رله‌مانتاران و بۆ زانین سه‌رۆكێ په‌رله‌مانى ئه‌ڤ چه‌نده دزانى و رێگرى ل دویڤ مادێ 4/48 نه‌كریه و ئه‌ڤه دبیته رازیبوونه‌كا ڤه‌شارتى. لێ بریارا وێ بۆ راكرنا پارێزبه‌ندیێ ئه‌وا كۆ 57 په‌رله‌مانتاران ده‌نگ دایێ ل 7/5/2020 دبیته بریاره‌كا سیاسی نه‌ك قانۆنى و زێده‌بارى كۆ تشته‌كێ هه‌ڤدژه بۆ بێلایه‌نییێ كۆ پێدڤییه ساخله‌ته‌كێ سه‌ره‌كییێ سه‌رۆكێ په‌رله‌مانى بیت، و ئه‌ڤ چه‌نده ژى زه‌ره‌رێ ل به‌رژه‌وه‌ندییا گشتیا هه‌رێمێ دكه‌ت چونكى په‌رله‌مان مژویلى درێژكرنا وه‌رزێ خۆ یێ یاسادانانێ بوو بۆ گه‌نگه‌شه‌كرنا بابه‌تێن گرنگێن هه‌رێمێ یێن گرێداى په‌ژیكا كۆرۆنایێ و شیانێن دارایی و كێشه‌یێن ده‌ڤه‌رێن ب ناكووكی و قه‌رزێن دارایی و گه‌له‌ك مژارێن هه‌لاویستى، و هه‌روه‌سا ئه‌ڤ چه‌نده مایتێكرنه‌كه د كارێ ده‌ستهه‌لاتا قەزاییدا چونكى داخازا راكرنا پارێزبه‌ندیێ ل په‌ى داخازا سه‌رۆكاتییا دادگه‌ها سلێمانییێ و دادگه‌ها تێهه‌لچوونا هه‌ولێرێ هاتبوو كرن و ئه‌ڤ چه‌نده ژى سه‌رپێچییه ل سه‌ر ده‌ستهه‌لاتا قه‌زاكارییێ.