هاوڵاتیانی خۆشەویستی كوردستان...
ئێمە لە فراكسیۆنی یەكگرتووی ئیسلامی كوردستان كە شانمان دایە ژێر بەرپرسیاریەتی كاراكردنەوەی پەرلەمان بۆ ئەوەبوو ئەم پەرلەمانە لە پرسە چارەنوسسازەكان رۆڵی یەكلاكەروە ببینێت بۆ ئەوەی لێرەوە بژێوی و ژیانی هاوڵاتیان چاكبكرێت و كۆتایی بە سیستمی نا ڕەوای پاشەكەوتی موچە بهێنرێت بۆ ئەوە بوو ئەو پەرلەمانە لەسەر كارەسات و رووداوەكان بڕیاری بوێرانەی خۆی بدات، بۆیە لە كاتێكدا بە رێككەوتنی ژێر بەژێری و گوماناوی خاكی كوردستان هەرزان فرۆشكراوەو ناپاكی و خیانەت لە خوێنی 2 هەزار شەهید و خەباتی نەتەوەیەك كراوە، شكۆی گەلێك شكێنراوە هەزاران پێشمەرگەی گیان فیدا دڵشكاون و سەنگەرەكانی بەرگریان پێ چۆڵكراوە .
لە جیاتی ئەوەی پەرلەمانی كوردستان لێپرسینەوە بكات لە كەمتەرخەم و سەبەبكارانی ئەم دۆخە پڕ ناسۆر و شلەژاوە و تاساوە كە بۆتە هۆی ئەوەی كە هەموو ماڵێكی كوردستان لە هەر چوار پارچە ئازیزەكە و هەموو شوێنێكی تری دونیا خەفت بار و تازیە بار بن .
لە لایەكی تر لە جیاتی فریاكەوتنی ئاوارەو لێقەوماوانی كەركوك و دووزخورماتوو و ناوچە كوردستانیەكانی تر كە سەرەڕای دەیان شەهید و بریندار لە پێشمەرگە و هاوڵاتیان و خۆبەخشەكان وە سوتاندنی سەدان ماڵی كورد و ژێر پێ خستنی ئاڵای پیرۆزی كوردستان لە لایەن ناحەزانی گەلەكەمانەوە نەك پەرلەمان و پەرلەمانتاران و فراكسیۆنەكان گفتوگۆ لەم دۆخە مەترسیدارە ناكەن بەڵكو سەرقاڵدەكرێن بە بابەتی دواخستنی هەڵبژاردنەكان لە كاتێكدا كە كۆمسیۆن رایگەیاندوە ئاستنگی یاسایی و ماددی و لۆجستی لە بەردەم پرۆسەكەدا هەیە ، بۆیە ئێمە لە فراكسیۆنی یەكگرتووی ئیسلامی كوردستان بایكۆتی كۆبونەوەی ئەمرۆی پەرلەمان دەكەین كە پێمان وابوو بابەتی زیندوو و گرنگی ئەمڕۆی پەرلەمان دەبوایە گفتوگۆكردن بوایە لەسەر دۆخی شلەژاو و نادیاری هەرێم .
لە كۆتاییدا هاوڵاتیانی خۆشەویستی كوردستان دەبێ لەو ڕاستیە دڵنیابن كە هەوری ڕەشی نا ئومێدی دەڕەوێتەوە و ئیرادەی خەڵكی كوردستان لە سەربەخۆیی و ئازادی و دادپەروەری بەرجەستە دەبێت و گەلی ئێمە هەرگیز تەسلیم بە نا ئومێدی نەبووە وە لە لایەكی تر یەكڕیزی نیشتیمانی بە تاكە زامنی پارستنی دەستكەوتەكانمان دەزانین وە ئەوەی لەدەستمان داوە دەبیًَ لەسەری راوەستین و پەند و وانەی لێوەرگرین وە ئەوەی كە ماوە رزگاری بكەین .
فراكسیۆنی یەكگرتووی ئیسلامی كوردستان
18/10/2017