2017/9/15
ئا: سه‌لام حسێن
سەرۆك و سكرتێری پەرلەمانی كوردستان رایانگەیاند، "كۆبونەوەی ئەمڕۆی پەرلەمان نایاسایی-یەو دەرەنجامەكانیشی پوچەڵن".
د.یوسف محه‌مه‌د سادق سه‌رۆكی په‌رله‌مانی كوردستان و فه‌خره‌دین قادر سكرتێری په‌رله‌مان له به‌یاننامه‌یه‌كی هاوبه‌شدا رایانگه‌یاند جارێكی تر له‌رێی كۆبونه‌وه‌یه‌كی نائاسایی و نایاسایی په‌رله‌مانه‌وه له‌بری ئاسایكردنه‌وه هێنده‌ی تر دۆخی په‌رله‌مانی كوردستانی نائاسایی كرایه‌وه و له چه‌ندین روه‌وه پێشێلكاری له په‌یڕه‌وی ناوخۆی په‌رله‌مان ئه‌نجامدرا.
به‌یاننامه‌كه راشیگه‌یاندووه ئه‌و كۆبونه‌وه‌یه گه‌ڕانه‌وه‌یه‌كی مه‌ترسیدار بوو بۆ سه‌رده‌می كاری نایاسایی له كاری په‌رله‌مانی كوردستان.
دەقی راگەیەندراوەکەی سەرۆک و سکرتێری پەرلەمانی کوردستان:
به ناوی خوای گه‌وره و میهره‌بان
هاونیشتیمانیانی خۆشه‌ویست..
واجارێكی تر, له‌ڕێی كۆبونه‌وه‌یه‌كی نائاسایی و نایاسایی په‌رله‌مانه‌وه, له بری ئاسایی كردنه‌وه‌ی, هێنده‌ی تر دۆخی په‌رله‌مانی كوردستان نائاسایی كرایه‌وه.
له‌م كۆبونه‌وه‌یه‌دا له چه‌ندین روه‌وه پێشێلكاری له په‌یڕه‌وی ناوخۆی په‌رله‌مان ئه‌نجام درا, هه‌ر له ئاراسته نه‌كردنی داواكاریی دانیشتنی نائاسایی بۆ سه‌رۆك و سكرتێری په‌رله‌مان, ئاماده نه‌كردنی به‌رنامه‌ی كاری دانیشتنی په‌رله‌مان له لایه‌ن ده‌سته‌ی سه‌رۆكایه‌تیه‌وه به پێی مادده‌ی (20/ 1)ی و ماده‌ی (54/ یه‌كه‌م/ 1-2)ی په‌یڕه‌وی ناوخۆی په‌رله‌مان, پێشێل كردنی ڕێوشوێنی گفتوگۆكردنی ئه‌ندامان له‌ناو هۆڵی په‌رله‌مان به‌پێی ماده‌كانی (55- 58- 74)ی په‌یڕه‌و, نه‌گرتنه‌به‌ری رێوشوێنی پێشكه‌ش كردنی پڕۆژه‌ی بڕیار و ئه‌نجامدانی خوێندنه‌وه‌ی یه‌كه‌م بۆی و ئاراسته كردنی بۆ لیژنه‌ی په‌یوه‌ندیدار و ئاماده كردنی ڕاپۆرتی لیژنه و رێوشوێنه‌كانی گفتوگۆ كردنی پڕۆژه‌ی بڕیار و ڕاپۆرتی لیژنه له‌سه‌ری له لایه‌ن په‌رله‌مان و په‌سه‌ند كردنی به‌پێی ماده‌كانی (71 و 72).
بۆیه كۆبونه‌وه‌یه‌كی وا نایاسایی ده‌ره‌نجامه‌كانیشی پوچه‌ڵن.
هه‌مو ئه‌م پێشێلكاریه په‌یڕه‌وییانه له‌كاتێكدایه كه ئێمه له‌م خوله‌ی په‌رله‌مانی كوردستان ئامانجمان بو كه سه‌رده‌می كاری ناقانونی له كاری په‌رله‌مانی كۆتایی پێبهێنین و, بچوكترین هه‌ڵه‌ی په‌یره‌وی له كاره‌كانمان ڕاست بكه‌ینه‌وه.
ئه‌م كۆبونه‌وه‌ی په‌رله‌مان گه‌ڕانه‌وه‌یه‌كی مه‌ترسیدار بو بۆ سه‌رده‌می كاری نایاسایی له كاری په‌رله‌مانی كوردستان.
هه‌ڵبه‌ت هه‌ڵپروزكاندنی مافی چاره‌ی خۆنوسونی گه‌لی كوردستان و سه‌ربه‌خۆیی, ئه‌م مافه سه‌ره‌تاییه‌ی خه‌ڵكی كوردستان, له كۆبونه‌وه‌یه‌كی وا نائاسایی و نایاساییدا هه‌م كه‌م نرخ و بایه‌خ كردنی ئه‌م بابه‌ته چاره‌نوسسازه‌یه و هه‌میش هێنده‌ی تر شكاندنی شكۆی په‌رله‌مانی كوردستانه وه‌ك مه‌رجه‌عی باڵای شه‌رعی و هه‌ڵبژێردراوی خه‌ڵكی كوردستان.
ئه‌نجام دانی ریفراندۆم, پێویسته به یاسا رێكبخرێت, هه‌ر وه‌ك یاساكانی هه‌‌ڵبژاردنی په‌رله‌مان و سه‌رۆكایه‌تیی هه‌رێم و ئه‌نجومه‌نی پارێزگاكان و, یاسای ئاماده كردنی پڕۆژه‌ی ده‌ستوری هه‌رێم بۆ ڕاپرسی.
له هه‌مان كاتدا سپاردنی بڕیاردان له‌م پرسه چاره‌نوسسازه به لایه‌نی نادیار و ناڕه‌سمی و هه‌ڵنه‌بژێردراو, ته‌نازول كردنه له ده‌سه‌ڵاته‌كانی په‌رله‌مانی كوردستان و مه‌رجه‌عیه‌تی, كه ئه‌مه‌ش كارێكی نایاساییه.
به هیوای ئه‌وه‌ی ئه‌م ڕه‌وته نایاساییه له‌ناو په‌رله‌مانی كوردستان لێره‌دا بوه‌ستێت و, سه‌رباری ئاسایی كردنه‌وه‌ی دۆخی په‌رله‌مان, هه‌موان كار بكه‌ین بۆ چه‌سپاندنی پرینسیپه‌كانی دیموكراسی و یاساسه‌روه‌ری و ئه‌نجامدانی هه‌ڵبژاردنه گشتیه‌كان له كاتی خۆیدا و هێنانه‌كایه‌ی خۆشگوزه‌رانی و حوكمی دامه‌زراوه‌یی له كوردستان.
فه‌خره‌دین قادر
سكرتێری په‌رله‌مانی كوردستان
د. یوسف محه‌مه‌د سادق
سه‌رۆكی په‌رله‌مانی كوردستان
15/ 9/ 2017