فارس نەوڕۆڵی
زۆر دوور نییە ئەگەر وەک مێژوو سەیری بکەین دوێنێیە کورد فەرمانڕەوایی خۆی دەکات و نیمچە قەوارەیەکی لە باشور و لە جوگرافیایەکی دیاریکراودا پێکهێناوە، بۆیە زۆر قورس نییە گوتار و کرداری حزب و کەسایەتیە حزبیەکان بخوێنینەوە و لێیان تێبگەین، بەتایبەتی ئێستا لە بانگەشەی هەڵبژاردنداین هەموو حزبەکان و کەسایەتیەکانیان خۆیان وەک فریشتە و ئەوانی دیکە وەک شەیتان نیشان دەدەن. (مەبەستم ئەو حزب و کەسایەتیانەیە ڕۆژێک لە ڕۆژان لە یەکێک لە کابینەکانی حکومەت بە ئاستێک بە جۆرێک بەشداربوون و سوودمەند بوون تێیدا)
ئێستا بێ ئەوەی بیر لەوە بکەنەوە ڕۆژێک لە کێکی ئەم دەسەڵاتە چەتاڵێکیان بەدەستەوە بووەو لێیان خواردووە، کەچی ئێستا بە ژەهرو بە بۆگەن باسی ئەکەین ڕۆژێک لە ڕۆژان وەک ئاسنگەر داتکوتاوە بکوژ و ببڕ بوو بیت، ئێستا خۆت بە ڕۆشنگەرو ئەوانی دیکە بە نەفام بزانێ و وا نیشان بدات ئەگەر دەنگیان پێ بدەن ئیتر دادپەروەری سەراپای نیشتمان دەگرێتەوە وەک ئازادیخوازی عەیار بیست و چوار خۆیان نمایش دەکەن، بەڵام بێ ئاگا لەوەی خەڵک لە نمایشی درۆزنانە تێدەگات و هیچ دوێنێیەکی لەبیر ناچێ، ئاخر ناکرێ لە خێردا شەریک و لە شەڕدا تەریک بن، بۆیە ئەگەر سەیری ئەو دروشمانەی حزبەکان و کەسایەتیەکانی ناو بانگەشە بکەین لۆژیکی بیخوێنینەوە تێدەگەین تەنها دروشمی بریقەداری بێ ناوەڕۆکن بۆ فریودانی ڕای گشتیە و خەڵک دەزانێ ئەم دروشمانەی ئەمڕۆ لەتەک کردارەکانی دوێنێدا ناتەبان، پڕن لە یەکدژی، ئاخر خەڵک پرسیار دەکات ئەم هەموو میدیاو سەیارەو موچەخۆری سێبەر و بەرخۆری میدیاییە بەچی بەڕێوە دەبرێ ئەگەر جۆرێک لە جۆرەکان لەم حکومەتەتان وەرنەگرتبێت یان خوا نەیکا بە گوناح بۆم لە شوێنێکی دیکەی گوماندار وەرتان نەگرتبێت، من باوەڕم وایە بەبێ ئۆپۆزسیۆنێکی بەهێز دەسەڵاتێکی بەهێزمان نابێت، بێ دەستاو دەستکردنی دیموکراتی و مەدەنیانە وەک وڵاتانی جیهانی دیموکراتی ناچینە ناو مێژووەوە، بەڵام چی جۆرە ئۆپۆزسیۆنێک دەتوانێ ئەلتەر ناتیف بێت؟ بەڕای من بێ هیچ کاریگەرییەکی ئایدۆلۆجی لەسەر بۆچوونەکانم ئەم ئۆپۆزسیۆنانەی ئێستا نە پێگەشتنیان و نە تێگەشتنیان پەروەردەی سیاسی و ئیدارییان نەگەشتووەتە ئەو ئاستەی کە بەدیلی دەسەڵات بن.
بۆیە وەک ئاماژەم پێدا ئەو حزب و کەسایەتیانەی ڕۆژێک لە ڕۆژان و ئێستاش بەڕێگەی جیاواز سودمەندی پارەو پرۆژەی جیاجیا بوون و هەن لە هەلومەرجی پرۆسەی سیاسی کوردستان ئێستا بە دروشم بازی بوونەتە ئۆپۆزسیۆن، ئەوە بە خۆیان نازانن کە خەڵک دەزانێ لەچی پارادۆکسێکدان، بە پێوانەی لۆژیک لەتەک خۆیاندا تەواو ناتەبان و دروشمەکانیان پێچەوانەی چاوەڕوانیەکانن. دروشمی بێ کۆتایی و ئاڵۆزن واتە لە کردارو گوفتاریاندا پارادۆکسێکی زۆر هەیە، بۆیە هێشتا ئەم هێزانە هێزی بەدیل و هێزی بەرهەم هێنانی تەندروست نین لە کایەی سیاسی و ئابووری و کۆمەڵایەتیدا، لەبەر ئەوەی بەدیلی ڕاستی نین بەشێکی زۆریان دژبوونیان لەتەک دەسەڵات بەرەنجامی بەرژەوەندی حزبی و کەسییە نەک چاکەی گشتی.